Vergilər Nazirliyi yanında Vergi Cinayətlərinin İbtidai Araşdırılması Departamenti rəisinin birinci müavini, keçmiş Vergilər naziri Fazil Məmmədovun yeznəsi Namiq Quliyevin işdən çıxarılması ilə bağlı deyilənlər özünü doğrultmayıb

Yenixeber.org: Ötən ilin dekabrında yeni nazir Mikayıl Cabbarov tərəfindən işdən çıxarıldığı deyilən Namiq Quliyev elə öz vəzifəsində qalıb.

Belə ki, Vergilər Nazirliyi yanında Vergi Cinayətlərinin İbtidai Araşdırılması Departamenti rəhbər işçilərinin 2018-ci ildə vətəndaşların qəbul qrafikini açıqlayıb. Qrafikdə Departamentin baş direktorunun 1-ci müavini Namiq Quliyevin həftə içi hər gün saat 09:00-dan 18:00-dək vətəndaş qəbulu həyata keçirdiyi qeyd olunub.

Qeyd edək ki, Modern.az saytı ötən ilin 26 dekabr tarixində yaydığı məlumatda Vergilər Nazirliyi yanında Vergi Cinayətlərinin İbtidai Araşdırılması Departamenti rəisinin 1-ci müavini Namiq Quliyevin vəzifəsindən kənarlaşdırıldığını bildirmişdi.

Xatırladaq ki, Fazil Məmmədovun bacısının həyat yoldaşı olan Namiq Quliyev əvvəllər Vergilər Nazirliyində nazirin müşaviri vəzifəsində çalışıb. O, 2016-cı ilin fevral ayında Vergi Cinayətlərinin İbtidai Araşdırılması Departamenti rəisinin 1-ci müavini postuna gətirilib.