Yer üzündə hər bir insan ömrü üçün müəyyən olunmuş bir möhlət var, o möhlət gec-tez bitəcəkdir və bundan sonra o özünə məlum olmayan digər bir dünyaya, digər bir sistemə köçürüləcəkdir.
Yenixeberorg.biz: Müxtəlif ölkələrin hərblə bağlı hər hansı bir əlamətdar günündə meydanlarda nümayiş etdirilən, qiyməti
milyonlar, milyardlarla ölçülən cürbəcür döyüş texnikası nümunələrinə baxdıqca təəssüflənirsən. Qəmli-
qəmli düşünürsən ki, əgər bütün bunların ixtirasına, istehsalına, alğı-satqısına sərf olunmuş zəka,
zəhmət, vəsait sülh şəraitində dinc quruculuq və rifah naminə sərf olunsaydı, gör o zaman dünya necə
gözəl, insanlar nə qədər bəxtəvər, sağlam, uzunömürlü olardı.
Tarix boyu insan övladının öz yaratdığı şəfa verən, ömür uzadan, əkib-becərən, nemət yetişdirən yox,
ölümsaçan cihazlar ixtira etməsi, nümayiş etdirməsi və bundan qürrələnməsi, daha doğrusu,
qürrələnməyə məcbur olması kimi hallar acı bir təəssüf hissi yaradır.
Düşünürsən və ürəyindən keçir ki, kaş lap yaxın zamanda insan zəkası o qədər dərinləşə ki, artıq
müharibəyə aparan bütün səbəblərin necə anlamsız olduğunu dərk edə.
Bu dünyada təkzibolunmaz bir həqiqət mövcuddur: Yer üzündə hər bir insan ömrü üçün müəyyən
olunmuş bir möhlət var, o möhlət gec-tez bitəcəkdir və bundan sonra o özünə məlum olmayan digər bir
dünyaya, digər bir sistemə köçürüləcəkdir.

Min illər boyu təsdiqlənmiş bu sadə həqiqətin dəfələrlə şahidi olmuş insan cinsi məntiqlə gərək
müharibədən və hər cür işğaldan, hər cür qəsbkarlıqdan, hər cür şərdən imtina edib sülhü seçə. Amma
qəti olaraq, dəyişməz bir qərar olaraq seçə bilmir. Niyə?
Ətrafında uzun illər boyu düşündükcə bu sualın təxmini cavabı aydın olur. Bu cavabın əsas bir elementi,
boyük bir hissəsi olaraq bunu demək olar: müharibədən, qəsbkarlıqdan, zorakılıqdan imtina edib, sülhü
seçmək istəyən insan gərək əvvəlcə özünün özü ilə mübarizəsində qalib gəlib özü ilə əbədi sülh bağlaya
bilə. Belə bir sülhün əldə edilməsi isə döyüş meydanlarında qələbənin əldə edilməsindən qat-qat
çətindir...
İmarət Cəlilqızı