Bakıda keçirilən cüdo üzrə böyüklər arasında dünya çempionatında bu gün Azərbaycanın 4 təmsilçisi tatamiyə çıxacaq.

Yenixeberorg.biz xəbər verir ki, qadınlardan Madina Kaisinova (+78 kq), kişilərdən isə Camal Qamzatxanov, Uşanqi Kokauri və Kənan Nəsibov (hər üçü +100 kq) mübarizəyə qoşulacaqlar.

M.Kaisinova yarışa 1/16 finaldan başlayacaq. Onun ilk rəqibi İtaliya təmsilçisi Asya Tavano olacaq.

Mundiala 1/32 finaldan start verəcək C.Qamzatxanov Çili cüdoçusu Fransisko Solislə qarşılaşacaq.

U.Kokauri və K.Nəsibov mübarizəyə 1/16 final mərhələsindən qoşulacaqlar. Kokaurinin rəqibi Qırğızıstan təmsilçisi Emirxan Yoldoşkazıyev olacaq. Nəsibov isə Losseni Kone (Almaniya) – Vidak Malyeviç (Serbiya) görüşünün qalibi ilə üz-üzə gələcək.

Xatırladaq ki, Milli Gimnastika Arenasında təşkil olunan mundial oktyabrın 11-də başa çatacaq. Daha əvvəl Azərbaycan təmsilçilərindən Əhməd Yusifov (60 kq) qızıl, Zelim Tçkayev (81 kq) gümüş, Rəşid Məmmədəliyev (73 kq), Ömər Rəcəbli (81 kq) və Murad Fətiyev (90 kq) bürünc medal qazanıblar.

"Səbail" daha bir futbolçu transferini açıqlayıb.

Yenixeberorg.biz xəbər verir ki, bu barədə klub məlumat yayıb.

I Liqa təmsilçisi kamerunlu vinger Samuel Nonqo ilə müqavilə imzalayıb.

Xatırladaq ki, 22 yaşlı oyunçu son olaraq Albaniyanın "Elbasani" klubunun formasını geyinib. O, Türkiyənin "Adana Dəmirspor" komandasında da çıxış edib.

Azərbaycanın daha dörd cüdoçusu Bakıda keçirilən dünya çempionatında bu gün mübarizəyə başlayacaq.

Yenixeberorg.biz-in məlumatına görə, yarışın beşinci günündə Südabə Ağayeva (70 kq), Elcan Hacıyev, Murad Fətiyev və Süleyman Şükürov (hamısı 90 kq) tatamiyə çıxacaqlar.

S.Ağayevanın 1/32 finaldakı rəqibi ispaniyalı Ai Tsunoda Roustant olacaq.

E.Hacıyev 1/32 finalda ABŞ cüdoçusu Aleksander Knaufla, S.Şükürov eyni raundda norveçli Kornelius Eylertsenlə üz-üzə gələcək.

M.Fətiyev yarışa 1/16 finaldan qoşulacaq. O, Yeqor Varapayev (Belarus) – Teodoros Tselidis (Yunanıstan) görüşünün qalibi ilə görüşəcək.

Təsnifat mərhələsi saat 10:30-da başlayacaq. Medal görüşlərinin keçiriləcəyi final blokuna isə 18:00-da start veriləcək.

Xatırladaq ki, Milli Gimnastika Arenasında təşkil olunan mundial oktyabrın 11-də başa çatacaq. Daha əvvəl Azərbaycan təmsilçilərindən Əhməd Yusifov (60 kq) qızıl, Zelim Tçkayev (81 kq) gümüş, Rəşid Məmmədəliyev (73 kq) və Ömər Rəcəbli (81 kq) bürünc medal qazanıblar.

Monteneqronun Budva şəhərində keçirilən boks üzrə U-17 Avropa çempionatında Azərbaycan millisinin daha 5 idmançısı qələbə qazanıb.

Yenixeberorg.biz-in məlumatına görə, Nihad Məmmədli (48 kq) 1/16 finalda Lasaro Ernandesi (İspaniya) cəmi 58 saniyəyə tam üstünlüklə məğlub edib.

O, oktyabrın 7-də ikinci görüşündə ilk mərhələdən azad olan Filip Borkovski (Polşa) ilə üz-üzə gələcək.

İsmayıl Nəsirzadə (52 kq) də 1/16 finalda ilk raundda qələbəsini rəsmiləşdirib. Təmsilçimiz İlir Selmanidən (Şimali Makedoniya) güclü olub. Nəsirzadə oktyabrın 7-də 1/8 finalda Vakaris Kiseliunası (Litva) sınağa çəkəcək.

Şükar Əliyev (80 kq) də döyüşü vaxtından əvvəl xeyrinə bitirib. Boksçu 1/8 finalda Lazare Dokvadzeyə (Gürcüstan) üçüncü raundda tam üstünlüklə qalib gəlib. O, oktyabrın 8-də növbəti döyüşündə Maksim Rumyantsevlə (Belarus) münasibətinə aydınlıq gətirəcək.

Mehran Rəsulov (+80 kq) 1/8 finalda Levente Lorantanı (Macarıstan) mübarizədən kənarlaşdırıb. Rəqibini 4:1 (30:27, 28:29, 29:28, 30:27, 30:27) hesabı ilə məğlub edən milli üzvü növbəti cəhdində Stefanos Atanasiu (Yunanıstan) ilə qüvvəsini sınayacaq. Döyüş oktyabrın 8-də baş tutacaq.

Səma Abbasova (66 kq) da 1/8 final görüşündən qalib ayrılıb. O, Robin Oreyli (İrlandiya) üzərində 3:2 (29:28, 29:28, 27:30, 28:29, 29:28) hesabı ilə qələbə qazanıb. Abbasova oktyabrın 7-də Aleksandra Kerdolla (İsrail) gücünü yoxlayacaq.

Qeyd edək ki, 40 ölkədən 473 boksçunun qatıldığı Avropa çempionatı oktyabrın 11-də yekunlaşacaq.

"Turan Tovuz" bu gün Bakıda Türkiyənin "Fənərbağça" komandası ilə yoxlama oyunu keçirəcək.

Yenixeberorg.biz xəbər verir ki, qarşılaşma Tofiq Bəhramov adına Respublika stadionunda baş tutacaq.

Matç saat 20:00-da start götürəcək. Görüşün baş hakimi Rəvan Həmzəzadə olacaq. Oyundan əldə olunacaq gəlir Qarabağ Dirçəliş Fonduna ianə ediləcək.

Xatırladaq ki, 1994-cü ildə Azərbaycanı avrokuboklarda təmsil edən ilk komanda "Turan" olub. Qərb təmsilçisinin UEFA Kubokundakı (hazırkı UEFA Avropa Liqası) rəqibi isə "Fənərbağça" idi. İstanbul komandası hər iki matçda qalib gəlib - 5:0, 2:0.

Artıq xizək sürmək üçün kilometrlərlə məsafə qət etməyə ehtiyac yoxdur. Paytaxtın tam mərkəzində fəaliyyətə başlayan "Ski Center Baku" bu unikal həzzi bir addımlığınıza gətirir!

Yenixeebrorg.biz: Bakıda ilboyu xizək və snoubord üzrə məşq imkanı yaradan "Ski Center Baku" fəaliyyətə başlayıb.

Mərkəzin rəsmi açılış mərasimində gənclər və idman naziri Fərid Qayıbov, Azərbaycan Qış İdman Növləri Federasiyasının prezidenti, Azərbaycan Respublikası Dövlət Turizm Agentliyinin sədri Fuad Nağıyev və digər rəsmi qonaqlar iştirak ediblər.

2800 dratmetr sahəni əhatə edən müasir mərkəzdə quraşdırılan 3 ədəd "MaxxTracks" məşq yamacı və "Olympus SkyTech" simulatoru sayəsində ilboyu xizək və snoubord sürmək artıq realdır.

- Hər kəs üçün əlçatandır: İstər yeni başlayan, istərsə də təcrübəli xizəkçi və snoubordçu olun, ilboyu peşəkar məşqlər sizi gözləyir.

- Gələcəyin çempionları yetişir: Uşaqların və gənclərin qış idman növlərinə cəlb olunması əsas istiqamətlərdən biridir; məktəblilər üçün tanışlıq proqramları, məşq qrupları və məşqçi seminarlarının təşkili planlaşdırılır.

Azərbaycanda qış idman növləri üzrə məşq imkanlarını genişləndirmək və yeni idmançıların inkişafına şərait yaratmaq məqsədi daşıyan "Ski Center Baku"da yerinizi alın, yay-qış demədən əsl xizək həyəcanını yaşayın!

Gənclər və İdman Nazirliyi (GİN) ilə Azərbaycan Su İdmanı Federasiyasının (AZSİF) birgə təşkilatçılığı ilə keçirilən “Mingəçevir Reqatası-2026” beynəlxalq turniri başa çatıb.

Yenixeberorg.biz: Reqatanın son günündə “Kür” Olimpiya Tədris-İdman Mərkəzində idmançılar 11 dəst medal uğrunda mübarizə aparıblar.

Azərbaycan komandasında qızıl medalları 2 nəfərlik kayak qayığında 200 metr məsafədə (2008-2009) Tengiz Qaqnidze – Qiyas Əhmədov, 1 nəfərlik kayak qayığında 500 metr məsafədə (2010-2011) Mustafa Vəlizadə və 1 nəfərlik kayakda 500 metr məsafədə (2008-2009) Əlimurad Hacızadə qazanıblar.

Gümüş medala akademik avarçəkmə üzrə 2 nəfərlik qayıqda 1500 metr məsafədə (2008-2009) Azər İlyasov – İsabala Dadaşzadə layiq görülüblər. Qiyas Əhmədov (2008-2009) 1 nəfərlik kayak qayığında 500 metr məsafədə ikinci olub. Elmir Tarverdiyev – Mustafa Vəlizadə (2010-2011) 2 nəfərlik kayak qayığında 500 metr məsafədə fəxri kürsünün ikinci pilləsinə yüksəliblər.

2 nəfərlik kayak qayığında 200 metr məsafədə (2010-2011) Maqsud Mantaşev – Nizami Kərimov, eyni növdə fərqli yaş kateqoriyasında (2008-2009) Mikayıl Vəliyev – Sabir Ağayev, 1 nəfərlik kanoe qayığında 500 metr məsafədə (2008-2009) Hüseyn Səmədli, akademik növdə 2 nəfərlik qayıqda 1500 metr məsafədə (2008-2009) İsmayıl Şirinov – Tunar Məmmədzadə, 1 nəfərlik kayak qayığında 500 metr məsafədə (2008-2009) Tengiz Qaqnidze bürünc medal qazanıblar.

Bununla da Azərbaycan komandası reqatanı 7 qızıl, 5 gümüş və 10 bürünc medalla tamamlayıb.

Yekun nəticələrə əsasən kayak və kanoe növündə Özbəkistan 8 qızıl, 4 gümüş, 1 bürünc medalla kubokun sahibi olub. Azərbaycan 6 qızıl, 4 gümüş, 8 bürünclə ikinci, Ukrayna 2 qızıl, 1 gümüş medalla 3-cü yeri tutub.

Akademik avarçəkmədə də kuboku Özbəkistan qazanıb – 2 qızıl, 2 gümüş, 2 bürünc. Azərbaycan 1 qızıl, 1 gümüş, 2 bürünclə bu növdə də ikinci yerdə qərarlaşıb. İlk üçlüyü 1 qızılla Gürcüstan qapayıb.

Xatırladaq ki, “Mingəçevir Reqatası-2026” sentyabrın 29-da Füzulidə yerləşən Köndələn su anbarında start götürüb.

UEFA Millətlər Liqasının qrup mərhələsində bu gün üz-üzə gələcək Azərbaycan və Lixtenşteyn yığmaları daha əvvəl 5 dəfə qarşılaşıblar.

Yenixeberorg.biz-in məlumatına görə, Azərbaycan millisi bu oyunların 3-də qələbə qazanıb.

Rəqib bir dəfə qalib gəlibsə, bir görüşdə heç-heçə qeydə alınıb.

Tərəflərin ilk dueli 1998-ci ildə baş tutub. Avropa çempionatının seçmə mərhələsinin Vadutsda baş tutan oyununda Lixtenşteyn seçməsi qalib gəlib - 2:1. Bu, rəqibin rəsmi matçlarda ilk qələbəsi kimi tarixə düşüb.

Komandaların həmin seçmə mərhələdəki növbəti oyunu 1999-cu ildə keçirilib. Azərbaycan millisi rəqibini 4 cavabsız qolla üstələyib.

Azərbaycan və Lixtenşteyn yığmaları növbəti dəfə DÇ-2010-un seçmə mərhələsində rəqib olublar. 2008-ci ildə Bakıda reallaşan matçda hesab açılmayıb. Vadutsda baş tutan görüşdə isə Azərbaycan millisi 2:0 hesablı qalibiyyətə imza atıb.

Tərəflər son olaraq 2013-cü ildə yoldaşlıq oyununda qarşılaşıblar. Dubayda gerçəkləşən matçda Azərbaycan yığması rəqibini məğlub edib - 1:0.

Xatırladaq ki, D Liqasının 2-ci qrupunun Azərbaycan - Lixtenşteyn qarşılaşması bu gün Tofiq Bəhramov adına Respublika stadionunda, saat 20:00-da start götürəcək.

Azərbaycan Basketbol Liqasının (ABL) qalibi olan klub 1 milyon 400 manat əlavə mükafat qazanacaq.

Yenixeberorg.biz: Bu barədə Azərbaycan Basketbol Federasiyasından (ABF) məlumat verilib.

ABL-də yeni mövsümə başlayan bütün klublar şərtsiz olaraq 300 min manat alacaqlar.

Çempionatı ikinci yerdə başa vuran komandaya 700 min manat həcmində əlavə maliyyə dəstəyi veriləcək.

ABF 2026/2027 mövsümündən etibarən Azərbaycan Basketbol Liqasında (ABL) idarəetmə və inkişaf yanaşmasını dəyişib. Ölkə basketbolunun keyfiyyətini artırmaq, klublar arasında rəqabəti gücləndirmək və azarkeş axınını stimullaşdırmaq məqsədilə yeni maliyyələşdirmə modeli tətbiq olunur.

Ümumi büdcə əvvəlki illərlə oxşar səviyyədə saxlanılsa da, vəsaitlərin bölüşdürülməsi artıq zəmanətli ödənişlərə deyil, klubların performansına və müəyyən edilmiş şərtləri yerinə yetirməsinə əsaslanır.

​Hər oyuna ən azı 300 azarkeş cəlb edən klub, hər matç üçün 3 min manat qazanacaq. Mövsüm ərzində keçirilən 21 oyunda bu şərti ödəyən klub büdcəsinə əlavə 63 min manat əlavə edə bilər.

Qazanılan hər qələbə 10 min manat dəyərində qiymətləndirilir. Mövsüm ərzində maksimal qələbə göstəricisi ilə klublar 210 min manata qədər mükafat əldə edə bilərlər.

Mövsümün sonunda pley-offun yarımfinal mərhələsinə vəsiqə qazanan 4 klubun hər birinə əlavə 150 min manat ayrılacaq.